Sør-Trøndelag har ein lang og stolt
tradisjon for EU-motstand, og vi har heile tida vore blant nei-sidas
bastionar. Mykje av det kan nok tilskrivast at vi er eit sterkt
jordbruksfylke, og bøndene har heile tida vore blant dei som har
hatt mest å tape på EU-medlemskap. Norsk medlemskap i EU vil rive
grunnen totalt bort under det norske jordbruket, ved å gjera dagens
subsidienivå ulovleg, fjerne alt av tollgrenser og fjerne
reguleringar. Dagens politikk tar omsyn til at prisnivået i Noreg er
mykje høgare, og løningane våre er mykje høgare, enn dei er i for
eksempel Latvia. Med desse verkemidla gjer vi det muleg å vera bonde
i Noreg. Utan dei er det nesten berre å gi opp med ein gong.
Generelt har vi tre hovudgrunnar til å
vera mot EU-medlemskap: den første er folkestyre, i EU er fri flyt
viktigare enn fritt demokrati, og dei har grunnlovsfesta ein gitt
politisk retning – marknadsliberalisme. Vil eit medlemsland ha ein
annan politikk, vel, synd, det får dei ikkje lov til. Ikkje særleg
demokratisk.
Den andre er miljø. EU har fri flyt av
alt, som fører til ei heftig transportauke. Det er dessutan eit
system som baserer seg på økonomisk vekst herifrå til æva – eit
openbart miljøproblem. Når pengar og profitt konstant er viktigare
enn miljø, kan ikkje EU bli ein del av løysinga på klimaproblema,
men heller ein del av sjølve problemet.
Den tredje er solidaritet. I Spania er
kvar fjerde person arbeidsledig, i landa som har innført euro er
arbeidsløysa rekordhøg og krisa i Europa plagar vanlege grekarar,
spanjolar og irar kvar einaste dag. Krisa er resultatet av EUs
menneskefiendtlege politikk, som sett EU-systemet framfor sine eigne
innbyggjarar. Resultatet er arbeidsløyse, høgreekstremisme, kutt og
elende.
«Fra Stange er det langt til Brüssel»,
heitar det i eit godt, gamalt nei-slagord. Frå Trondheim er det enda
lengre. Avgjersler om kva som skal skje i norske bygder blir tatt av
tyske og franske byråkratar, utan at vi har noko folkeleg påverknad
på det. 73% av politikken i norske kommunar blir påverka av
EØS-avtalen – EU-light versjonen vi har i dag – og alle dei
viktigaste avgjerslene blir tatt av ikkje-folkevalde dresskledde
mannfolk.
Dermed blir politikken derifrå lite
basert på kvardagen i utkant-Noreg, lite basert på den røynda vi
lever i. Særleg tydeleg ser vi det på anbodsreglane, som seier at
alt av busstrafikk skal setjast ut på anbod. Som om det er så mykje
pengar å tene på å køyre buss i Roan? Vi ser det også på
post-fronten: med EUs tredje postdirektiv ville det kosta mykje meir
å sende eit brev frå Osen til Røros enn frå Oslo til Oslo. Lista
over tilsvarande kjip overstyring er lang og stygg, og i seg sjølv
ein god grunn til å vera mot EU.
Eg er glad for at Sosialistisk Ungdom
står krystallklart på vår side, neisida, i denne kampen, og er
takknemleg for den støtten vi har fått frå dei opp gjennom. SU er
saman med mange andre organisasjonar ein viktig del av den breie
neisida, kor vi har vist at samhald gir styrke og siger. Neisida har
alltid vore brei og fragmentert, forskjellige organisasjonar og
personar på neisida har kvar sine argument for å vera mot, men det
som samlar oss er ein motvilje mot å gi EU styringsretten over Noreg
og mot norsk medlemskap i EU.
Men SU har også vore ein viktig
alliert for Ungdom mot EU i kampen mot dei forskjellige kjipe
direktiva som kontinuerleg kjem frå EU. Dei siste åra kan vi nemne
vikarbyrådirektivet (som pålegg Noreg å opne for vikarbyrå),
datalagringsdirektivet (som vil gjera slutt på prinsippet om at ein
er «uskyldig inntil det motsette er prova» og overvake alle) og
postdirektivet som viktige direktiv vi saman har kjempa mot.
No står kampen om helsevesenet (med
helsedirektivet) og jernbanen (med EUs jernbanepakke fire), der EU
vil tvinge oss til å opne for private sjukehus og til å
konkurranseutsetje all jernbane. Noreg har sagt nei til skadeleg
politikk før, vi gjorde det på ein flott måte da vi sa nei til
postdirektivet. Det er på tide å gjera det igjen, og vinne kampen
for nasjonal styring over både helsevesen og jernbane. Det klarer
ikkje Ungdom mot EU å gjera aleine, tvert om treng vi sterk støtte
frå både SU og resten av nei-rørsla – men saman kan vi vinne
igjen!
Mads Opheim,
leiar i Ungdom mot EU
Ingen kommentarer:
Legg inn en kommentar